Era xuño de 2020 e coa pandemia dificultando cada aspecto do día a día, o daquela concelleiro de Mobilidade Juan Villoslada anunciou que o Concello tiña a intención de impulsar unha Ordenanza da Mobilidade. Meses despois iniciouse unha ronda de consultas que se poderían incorporar ata novembro. Hoxe, a finais de xaneiro de 2023, non hai nin rastro desa Ordenanza.
Desde o BNG reclámanlle ao Goberno de Inés Rey saber que foi desa intención á que o grupo nacionalista fixo achegas centradas en cuestións relativas á accesibilidade, á regulación dos vehículos de mobilidade persoal (VMP), mobilidade ciclábel e peonil e aparcadoiros.
Todos eles temas de actualidade hoxe e problemas que seguen esperando solución. E aos que hai que engadir tamén a barra libre coas terrazas, outra das grandes preocupacións dos veciños… e dos hosteleiros, que continúan a espera de novidades por parte de María Pita. Hai un ano que dende o Concello se colocaba como reto principal culminar as ordenanzas de mobilidade e a de terrazas. Ambas están aínda á espera.
Nos últimos meses, as queixas no eido da mobilidade foron constantes por parte dos veciños, sobre todo no que se refire aos cambios imprevistos nas rúas da cidade e tamén nas dificultades que atopan as persoas con mobilidade reducida.
A edil nacionalista Avia Veira cre que o Goberno local ten que deixar de perder o tempo con cuestións menores. Pide resposta sobre se a Ordenanza de Mobilidade continúa en fase de redacción e por que non se remataron os traballos comprometidos en 2022: “En todo o ano non soubemos nada sobre a Ordenanza. Mentres tanto, asistimos mes a mes a Plenos en cuxas ordes do día os asuntos resolutivos do Goberno adoitan ser cuestións mínimas, sen que se dea impulso a tarefas pendentes tan importantes coma esta”.