O nacionalista Francisco Jorquera anunciou que de cara ao pleno do próximo xoves 13 de abril o BNG porá o foco do caso do Sindicato de Traballadores da Limpeza (STL) nas concesionarias. Máis alá das responsabilidades que lle outorga ao goberno municipal, o candidato do Bloque sinala a necesidade de investigar a estas empresas, xa que «É moi chamativo que as concesionarias dos servizos de limpeza viaria e recollida de lixo non tivesen feito ningunha manifestación pública desde o inicio da investigación xudicial, pese a que da información que transcendeu publicamente podería derivarse que estas empresas se inhibiron das súas responsabilidades delegando nun grupo a política de persoal”.
A política de persoal é precisamente un dos feitos que sinala Jorquera, xunto con testemuñas que sinalan que a folga de 2022 foi pactada entre o STL e unha das concesionarias, como irregularidades graves que deben investigarse internamente dende o Concello e actuar en consecuencia exercendo «coa máxima contundencia a potestade sancionadora, incluída a rescisión dos contratos de concesión”.
De todos xeitos, Jorquera non quixo pasar a ocasión para sinalar tamén a responsabilidade dos últimos gobernos, mostrando a súa convicción de que «si coñecían a existencia de prácticas que merecían ser investigadas, mais non actuaron coa suficiente dilixencia. Gosto de ser prudente antes de formular acusacións tan graves. O que si creo é que todos os gobernos municipais nos últimos mandatos tiñan coñecemento de prácticas no servizo de limpeza e recollida de lixo que afectaban o seu correcto funcionamento e que merecían ser investigadas no mínimo no ámbito político”.
Mentres, a investigación sigue o seu curso e esta mesma semana a xuíza do Xulgado de Instrución número 6 da Coruña abriu tres pezas separadas á marxe do procedemento principal de supostos delitos de estafa, branqueo de capitais e corrupción entre particulares.
Deste xeito, investíganse tamén fraude á Seguridade Social, descubrimento e revelación de secretos de empresa e descubrimento e revelación de secretos en relación a un expediente tramitado no Concello da Coruña. Neste último, a maxistrada permitiu o personamento solicitado polo goberno municipal.