Continúan chegando críticas practicamente a diario dende Marea Atlántica ao Goberno Municipal que apoiou durante os últimos catro anos. Esta vez, mostrando a súa preocupación polo que entenden como un incumprimento de palabra máis de Inés Rey, á que acusan de estar intentando boicotear o programa ‘Mover os baixos’, acción impulsada pola Marea e para a que chegaran a un acordo co PSOE nas negociacións dos Orzamentos de 2022.
Lamentan en Marea que, como tantas outras partidas que figuran nos orzamentos, os 3 millóns destinados a afrontar o problema dos locais baleiros na Coruña, corran risco de estancarse: “Das tres liñas previstas, só se puxo en marcha unha: a convocatoria de compra de locais comerciais baleiros por parte do Concello, pero resulta case imposible de atopar para as persoas interesadas”.
Xan Xove, candidato á alcaldía, permítese pensar mal: “Case semella que Inés Rey quere que ‘Mover os baixos’ fracase. Ter un programa pioneiro para afrontar o problema dos baixos baleiros, grazas á iniciativa da Marea Atlántica, e lanzalo case en segredo non é, desde logo, a mellor forma de gobernar. Inés Rey debería estar a facer o necesario para que estas axudas cheguen a quen as precisa”.
Nun comunicado, consideran dende Marea Atlántica que apenas se lle deu visibilidade a este programa: “O concurso público para a compra de locais baleiros por parte do Concello, dotado con 1,5 millóns de euros, foi publicado no BOP o pasado 9 de xaneiro, e desde entón está aberto o prazo de presentación de ofertas, que rematará o 10 de marzo, en menos de tres semanas. Pero o goberno local non fixo nin o mínimo xesto para darlle publicidade. Instamos ao goberno local a publicar a convocatoria de compra de locais nun lugar visible e accesible da páxina web Municipal e a facelo antes de que remate o prazo para presentar ofertas, o vindeiro 10 de marzo. Tamén debería contar, á maior brevidade, cunha campaña de difusión específica, ao tempo que se activan as outras medidas do programa que seguen pendentes: a liña de axudas a pemes e persoas autónomas e a bolsa de alugueiro de locais”.
As críticas van máis alá, facendo fincapé na nula capacidade do Goberno Local para executar orzamentos: “Tampouco hai novidades das outras dúas liñas incluídas en ‘Mover os baixos’, nin da bolsa de locais en alugueiro —dotada con 600.000 euros— que debería estarse a lanzar a través de EMVSA, nin da liña de subvencións para pemes e persoas autónomas. Esta última debería terse lanzado ao longo do mes de xaneiro, segundo o compromiso do goberno local, pero segue en paradoiro descoñecido a 20 de febreiro. Os 900.000 euros para financiar actividades en locais comerciais permanecen gardados no caixón de Inés Rey”.