O Concello da Coruña reforza a súa aposta pola música galega de vangarda coa realización do ciclo cultural VANGAL, un evento multidisciplinar que combinará actuacións musicais con coloquios e intervencións expositivas. A directora da Área de Cultura do Concello, Bettina Kohlhass, presentou o ciclo de ‘Vangarda Galega Alternativa’ xunto con Marcos Gendre, director do ciclo, que se levará a cabo entre os días 14 e 16 de abril na Fundación Luis Seoane. «Este é un importante encontro musical co que queremos poñer en valor a escena actual do folclore galego» explicou.
O ciclo VANGAL reunirá a seis artistas actuais do panorama do folclore galego. Fillas de Cassandra actuará na Luis Seoane xunto con Sheila Patricia, MounQup, Faia, Teresa Ferreiro e Laura LaMontagne e PicoAmperio. De forma paralela, a Fundación Luis Seoane contará coa exposición «Colección Autóctona» de Teresa Ferreiro, ademais de diferentes charlas das artistas convidadas. «O obxectivo é non só ofertar unha programación musical senón tamén unha programación cultural e divulgativa poñendo en valor esa ‘reforestación’ que está a vivir a música galega tradicional e tamén a cultura» sinalou Bettina Kohlhass.
Esta iniciativa súmase ás actividades culturais postas en marcha polo Goberno de Inés Rey como o ciclo de música WOMEX, a feira de World Music máis importante do mundo, que se levará a cabo por primeira vez na Coruña entre os días 25 e 29 de outubro deste ano. «Coa realización deste ciclo de Vangarda Galega Alternativa avanzamos na consolidación da Coruña como capital cultural do noroeste atlántico, apostando pola cultura nas súas diferentes formas e moi especialmente pola cultura galega» concluíu.
A entrada ás diferentes actuacións e actividades do ciclo é de balde ata completar a capacidade.
A programación de VANGAL ao detalle
Ao longo dos días 14, 15 e 16 de abril realizaranse un total de seis actuacións musicais que terán lugar no patio da Fundación Luis Seoane, con entrada de balde ata completar a capacidade. Os horarios son:
- Venres 14 | Faia (21.00 h) e Teresa Ferreiro (22.15 h)
- Sábado 15 | Laura LaMontagne & PicoAmperio (21.00 h) e MounQup (21.00 h)
- Domingo 16 | Sheila Patricia (19.00 h) e Fillas de Cassandra (20.15 h)
Ademais das actuacións, haberá dúas charlas de Faia e MounQup baixo o título «Ta mère la saltimbanque» na que falarán sobre os procesos creativos e os coidados vinculados á nai na música. Serán no recibidor da Fundación Luis Seoane o venres 14 e o sábado 15 respectivamente, ás 20.00 h. As persoas que o desexen tamén poderán achegarse á Fundación Luis Seoane para ver a exposición de Teresa Ferreiro coas ilustracións da artista, dispoñible durante a totalidade do ciclo no patio da Fundación Luis Seoane.