Hai máis fame de fútbol que nunca e en Galicia percíbese só cunha ollada aos datos. Con algunhas competicións como a Preferente xa en marcha e coas datas de inicio fixadas en todas as categorías de fútbol 11, os números falan por si sós: un total de 524 equipos, 12 máis que na tempada da prepandemia (2019-2020), formalizaron correctamente o seu rexistro entre as seguintes categorías: Preferente Galicia, Primeira Galicia, Segunda Galicia e Terceira Galicia.
Cómpre salientar tamén a aparición dun bo feixe de novos equipos que comezan a súa andaina no fútbol galego. É, sen dúbida, a constatación de que practicamente o 100% dos proxectos sobrevive. Segundo a Real Federación Galega de Fútbol é unha demostración da fortaleza do fútbol afeccionado galego e do acerto das estruturas que se crean desde a entidade que preside Rafael Louzán.
A Preferente Galicia xa se puxo en marcha esta pasada fin de semana en dous dos seus grupos e os outros dous subgrupos arrincarán a nova andaina esta próxima fin de semana. Nesta Preferente Galicia compiten un total de 50 equipos. Na Primeira Galicia, pola súa banda, serán 100 os conxuntos que disputarán a nova competición durante esta tempada 2021-2022. Un total de 211 equipos formalizaron de forma correcta a súa inscrición para competir na Segunda Autonómica, mentres que na Terceira Autonómica foron 164 os colectivos que optaron por rexistrarse para volver vestirse de curto na tempada que están a punto de principiar.
A Real Federación Galega de Fútbol comeza ademáis esta semana a poñer en práctica o Programa de Axudas “Alento 21-22” destinado a todos os equipos que se inscribiron nas categorías do fútbol afeccionado galego: Preferente, Primeira, Segunda e Terceira Galicia.
O programa aprobado consiste na entrega de cinco balóns e material deportivo a cada equipo do fútbol modesto e tamén nunha dotación económica que varía en función da categoría. En total, a Federación vai repartir de maneira gratuíta preto de 4.000 balóns entre os equipos do fútbol afeccionado, o que supón unha partida superior aos 70.000 euros.
O Programa Alento inclúe tamén unha axuda económica por participación. Neste sentido, estanse a elaborar as bases da convocatoria, que será trasladada aos clubs para que poidan dispoñer desa subvención o antes posible.