O Gran Camiño 2025, a proba ciclista herdeira da Volta a Galicia, pecharase este ano na provincia da Coruña. Farao o domingo, 2 de marzo, nunha etapa con saída en Betanzos e meta en Santiago de Compostela que será a derradeira das cinco que compoñen o itinerario da proba, con etapas en Portugal e nas provincias de Lugo, Ourense e Pontevedra.
Así se desvelou este venres na presentación da etapa, celebrada no Liceo da cidade betanceira e na que estivo presente o presidente da Deputación da Coruña, Valentín González Formoso; o deputado de Deportes, Antonio Leira; a alcaldesa, María Barral; e o exciclista e organizador da proba, Ezequiel Mosquera e representantes dos equipos locais Club Ciclista Betanzos e Club Caimanes Betanzos.
Durante a súa intervención, Formoso quixo poñer en valor «a dobre alma» da proba. Unha dobre alma que é «deportiva e histórica, no relativo á vinculación co Camiño de Santiago». «Sen esta unión ao Camiño sería unha proba moi interesante, pero unha proba ciclista máis. O Camiño de Santiago dálle un importante empaque histórico», destacou o presidente, para quen o feito de que a última etapa do campionato ciclista discorra entre «a capital histórica do antigo Reino de Galicia e a capital estatutaria actual» convértea na «etapa das capitais» e outórgalle ao evento aínda máis compoñente histórico.
Valentín González Formoso recalcou que «a Deputación sempre está apoiando todos os eventos que axudan a poñer en valor o deporte porque para o deporte fai mellores persoas». Ademais, quixo agradecer á organización a posibilidade que lle outorgou á Deputación para «facer realidade un pequeno sono para Betanzos, un municipio moi vinculado ao ciclismo».
Fíxoo despois de que a alcaldesa betanceira, María Barral, recoñecese que a labor da Deputación da Coruña foi fundamental para que o seu municipio conte cunha proba moi «demandada». «Quero dar as grazas á organización e á Deputación da Coruña por apostar, como sempre, polo deporte, polo ciclismo e por cidades como Betanzos. De non ser por esa aposta quizais non poderíamos contar con probas deste nivel e que a nosa veciñanza poida gozar de algo tan espectacular como a saída dunha etapa dunha proba desta relevancia, que vai moito máis aló da nosa comunidade autónoma», destacou a rexedora.
Pola súa banda, Ezequiel Mosquera explicou que O Gran Camiño ten a posibilidade de «levar o deporte de primeiro nivel á porta das casas». «Sobre todo, a porta de casas como as de Betanzos, que ademais de toda a historia que ten e que debemos contar aos de fóra, conta cunha importante tradición ciclista», engadiu. Mosquera adiantou que a etapa coruñesa non será de montaña nin tampouco contrarreloxo, pero «será moi espectacular».
Polo momento, o Gran Camiño desvelou que a súa primeira etapa correrase por primeira vez en Portugal, entre as localidades de Maia e Matosinhos e que esta quinta e derradeira etapa do 2025 unirá Betanzos con Santiago de Compostela.
Nas súas catro edicións, O Gran Camiño tense consolidado como a gran proba de referencia do ciclismo galego, reunindo en cada edición a algúns dos principais equipos e estrelas do ciclismo a nivel nacional e internacional, como o danés Jonas Vingegaard, dobre gañador do Tour de Francia e gañador da proba nos últimos dous anos, Alejandro Valverde, Egan Bernal, Richard Carapaz ou o galego Carlos Canal.