José Manuel Sande, cabeza de lista á alcaldía da Coruña na candidatura de unidade conformada por Podemos, Esquerda Unida, Alianza Verde e independentes, confirmou a súa presenza en Madrid no acto de presentación da candidatura de Yolanda Díaz deste domingo, e a sintonía total dende Por Coruña con Sumar no eido municipal. Marea Atlántica non estará representada nese acto.
Sande explicou tamén que o lema da súa candidatura será “Por Coruña”, logo de seis semanas de proceso de escoita con colectivos de todo tipo, deportivos, veciñais, sociais, e tamén apoiando as reivindicacións das traballadoras de diferentes sectores, como as EIM ou o Consorcio de Turismo.
Subliñou que a urxencia dun revulsivo no Concello, que lle devolva a ilusión á xente, a actividade cultural e deportiva, as oportunidades para a xente moza, as políticas de vivenda e sociais, o urbanismo sensato, as políticas feministas e verdes, e nesa líña reivindican “devolverlle á luz á cidade” cun proxecto ilusionante.
Neste senso o candidato foi moi critico coa labor do goberno de Inés Rey neste mandato. «O Concello limitouse a deixar pasar o tempo aplicando proxectos do anterior mandato ou deixándoos nun caixón. No eido da Cultura temos o mellor exemplo: inacción e falta de proxecto», apuntou.