Por Coruña presentou este domingo a súa candidatura para concorrer ás Eleccións Municipais, con José Manuel Sande como cabeza da lista de unidade conformada por Podemos, EU, Alianza Verde e independentes que ven a conquistar o futuro goberno da cidade.
A lista, que pechan o histórico sindicalista Suso Díaz e o recoñecido economista Manuel Lago, é unha combinación entre as experiencias de perfís con veteranía nas loitas contra as inxustizas, a forza da mocidade e profesionais con traxectoria en diferentes eidos que procuran da cidade un lugar mellor.
Esta candidatura liderada por José Manuel Sande incorpora a Isabel Faraldo, actual concelleira, como número 2 e a arquitecta Carmen Armada no 3. Ademáis destacan perfís como Aitor Neira, mozo, autónomo e socio dun establecemento de hostelería, Trinidad Palacios, traballadora sociosanitaria no SAF (Servizo Axuda no Fogar) na cidade, Ángel Cabo, mestre e graduado en Pedagoxía, o guionista e promotor cultural Carlos Ares, Marina Río, histórica traballadora de Sargadelos e Edicións do Castro e produtora cultural.
Tamén destaca Sande a incorporación da empresaria Inma Rojas, Juan Rioja, funcionario da Deputación da Coruña, Marta Ferreiro, traballadora social nos Servizos Sociais no Concello da Coruña desde 1984, o pescador e percebeiro Xulio Montero, e a praceira Vicky Souto. Súmase tamén á candidatura Xiao Varela, para aportar a súa experiencia como concelleiro de Rexeneración Urbana no mandato 2015-2019.
A Coruña precisa dun revulsivo, dun cambio de rumbo para voltar a colocarse na cabeceira das políticas sociais, culturais, deportivas, económicas e industrais, fronte un Goberno municipal incapaz de sacar adiante proxectos propios e deixando de lado aos barrios.