O Instituto José Cornide de Estudos Coruñeses está “nun proceso de reestruturación para o adaptar aos tempos actuais” e para o dotar de “máis medios e recursos”, dixo o portavoz do Goberno Local, José Manuel Lage Tuñas, ao ser interpelado ao respecto, no Pleno do Concello, polo voceiro do grupo municipal do BNG, Francisco Jorquera. O Instituo en por obxectivo recompilar as actividades culturais durante as distintas épocas na cidade da Coruña. As áreas de estudo son a historia, a xeografía, a tradición e análise das traxectorias de persoeiros coruñeses, entre outros e ven facendo ese labor desde hai case 60 anos.
O que non explicou o portavoz do Executivo coruñés é por que o Instituto José Cornide está sen dirección desde agosto de 2020 –momento en que presenta a demisión o seu anterior director-, ten a súa web inoperativa e dispón só dunha persoa funcionaria, de modo que cando está de baixa ou pide permiso “o instituto ten que permanecer fechado para o público, o que tamén significa que non está accesíbel para as persoas investigadoras”, denunciou Jorquera.
O edil nado en Outes afirmou que é intención do Goberno Local preservar o patrimonio do José Cornide e reiterou que se acha nun “necesario proceso de renovación”. Non se entende ben como non se pode reestruturar un órgano que non ten dirección.
Jorquera criticou que o Instituto José Cornide sofre a desatención por parte do Concello. O abandono no que se atopa é o que explica “que o Goberno municipal mantivera ocultos os seus informes sobre memoria democrática e que logo se escudasen en que non tiña o refrendo formal do seu padroado”.
“O que non se pode facer é deixar esmorecer o Instituto José Cornide e escudarse logo en que o padroado leva moito tempo sen se reunir porque esa situación é produto do desleixo do Goberno Local”, criticou o voceiro nacionalista.