Achéganse as eleccións municipais e os diferentes grupos ultiman movementos para presentar as mellores candidaturas posibles. Se hai o pasado luns Marea Atlántica pechaba a súa lista coa presenza do excalcalde Xulio Ferreiro, hoxe foi Por Coruña, a lista que forman Podemos, Esquerda Unida e Alianza Verde a que designou para ese último posto ao histórico sindicalista Suso Díaz.
A candidatura que lidera José Manuel Sande recibe deste xeito o apoio dunha das figuras importantes do taboleiro, tanto pola súa traxectoria como por tratarse do pai da vicepresidenta do goberno e impulsora de Sumar, Yolanda Díaz.
Díaz foi traballador de Astano, onde desenvolveu unha intensa actividade sindical que o levou á cadea por negarse a pagar unha sanción inxusta. Desempeñou o cargo de Secretario Xeral de CCOO, liderando ao sindicato varios lustros. Nado en Ferrol, ten unha especial relación coa cidade herculina.
Suso Díaz da este paso sinalando que a candidatura de José Manuel Sande, Podemos, EU, Alianza Verde é o espazo de unidade da esquerda na Coruña, e o revulsivo que precisa o Concello para impulsar políticas municipais que axuden á veciñanza da cidade.
Pola súa banda José Manuel Sande subliñou o seu activismo antifranquista, cun compromiso inquebrantable pola democracia, e agradeceu o paso que da agora para formar parte dunha candidatura de unidade onde as forzas políticas combinarán cunha diversidade de perfís de persoas independentes.