Duras críticas ao Concello dende o BNG despois de que se fixera pública a lista de beneficiarios das axudas do Plan de Recuperación, Transformación e Resiliencia aprobado pola Comisión Europea. Unha lista na que non aparecía por ningures a cidade da Coruña.
Dende o grupo nacionalista sospeitan que non se trata de que a cidade non cumprira os criterios: “Vimos concellos con 35 puntos sobre un total de 100 que si van obter parte destes fondos. A ausencia do Concello da Coruña fainos pensar que non se presentou a solicitude”, sinala Avia Veira.
E non será porque non hai edificios municipais que necesiten melloras. A propia edil do BNG citou o caso da Casa da Cultura Salvador de Madariaga: “Aquí está o Arquivo Municipal. Pois ben, na súa propia memoria de xestión dise que se atopa nunha situación insostíbel a consecuencia das deficiencias que presenta este edificio”.
Esixen explicacións canto antes sobre a decisión, en caso de que así fora, de non concorrer a estas axudas: “Consideramos que hai múltiples edificios municipais que poderían ser rehabilitados, a se faceren obras de accesibilidade neles, e queremos que o Goberno Local nos dea explicacións sobre a ausencia do Concello na listaxe das entidades beneficiarias. O que non se pode argumentar desde o Goberno Local é que non ten fondos para reformar locais do Concello e logo non te presentar a unha convocatoria para subvencionar as obras de rehabilitación”.
Esta primeira liña de fondos europeos foi de 307 millóns de euros dos que se beneficiarán ata 36 proxectos galegos. Entre eles, a reforma do pazo de A Raposeira en Vigo (1,5 millóns), o edificio de Churruchaos en Pontevedra (1,7 millóns) e os complexos deportivos de Santa Isabel e o de Vite en Santiago de Compostela (3,3 millóns).