Avia Veira e Mercedes Queixas, números 2 e 3 da candidatura do BNG nas próximas eleccións municipais do mes de maio, presentaron este martes a iniciativa Primavera Cultural, un proxecto que vai «en contraste cun Goberno Local que neste mandato se ten caracterizado pola ausencia absoluta de política cultural».
As representantes nacionalistas aseguran que «para o BNG é moi importante a política cultural, en contraposición a un Goberno de Inés Rey desaparecido neste ámbito», apuntando que a súa presencia no Concello daría un cambio radical: «Recuperar o pulso creativo da Coruña non é un soño, é un compromiso. Queremos devolverlle a ilusión ás creadoras, ás mediadoras, ás espectadoras, barrio a barrio, mes a mes, porque a cultura non é froito merado do verán, é para nós o cordón umbilical que alimenta o proxecto político de cidade, transversal e transformador».
As críticas dende os diferentes grupos da corporación municipal foron constantes nos últimos anos. Primeiro pola pouca importancia que se lle dou á concellería de Cultura, asumida pola propia alcaldesa, pero tamén polo que se entende como unha deriva para os eventos multitudinarios como grandes festivais, deixando de lado outras disciplinas igual de relevantes.
Segundo o Bloque, «A “Primavera Cultural” dará coherencia a distintas accións que se nuclearán arredor de datas tan simbólicas como as seguintes: 17 de marzo (Día do Cómic), 20 de marzo (Día da Narración Oral), 21 de marzo (Día da Poesía, xusto o que se celebra hoxe), 27 de marzo (Día Mundial do Teatro), 1 de abril (Día das Letras Galegas), 2 de abril (Día do Libro Infantil e Xuvenil), 15 de abril (Día Mundial da Arte), 23 de abril (Día do Libro), 17 de maio (Día das Letras Galegas), 21 de maio (Día da Diversidade Cultural) e 9 de xuño (Día dos Arquivos)».
Queixas destacou a potencialidade que ten apostar pola cultura: «Acreditamos nun proxecto cultural municipal participado e inclusivo para unha cidade epicentro cultural artellado desde tres eixos: cultura de proximidade, cultura desestacionalizada e cultura para a cohesión social, a formación e a transformación. Trátase de ter confianza na potencialidade da cultura como garante da cohesión social, máis tamén como motor de actividade económica con grande capacidade de xeración de emprego».