En palabras da súa concelleira Avia Veira, o BNG foi moi crítico este xoves co Goberno Municipal debido aos continuos problemas cos que se atopan os universitarios no que se refire ao transporte público: «As liñas están absolutamente saturadas. Hai atrasos na 3A e no 7 e no 21 o colapso é total. O titular do servizo é o Concello, así que o Goberno Local tenlle que esixir á Compañía de Tranvías que reforce un servizo que é moi beneficioso en termos económicos para a concesionaria e que, porén, non responde ás necesidades do alumnado».
Porque ademais, a afluencia de usuarios do transporte público universitario foi a máis dende que o Concello e a UDC chegaron a un acordo para bonificar o billete. A cidadanía respondeu, pero non foi así dende a Compañía de Tranvías, nin tampouco dende María Pita se fixo nada por solucionalo: «Se ti produces un efecto chamada, tes que responder ofrecendo un mellor servizo».
Denuncian dende o grupo nacionalista que a clave está en que, en lugar de estar cos veciños, o Concello sempre elixe o bando contrario no conflito: «É unha cuestión de lóxica e de que o Goberno Local sexa capaz de poñerse de lado da cidadanía e non da Compañía de Tranvías. Pero o Goberno Local sempre está ao que diga a Compañía de Tranvías e non a dar satisfacción ás necesidades reais da xente».
Recorda Avia Veira que estes problemas veñen de lonxe e que non é a primeira demanda do BNG, «fixémolo o ano pasado en plena pandemia, cando era preciso que se respectasen as distancias. Fora imposible. Pero continuamos coa mesma saturación. A mocidade volve ir como sardiñas en lata».