Esta semana diSínoticias informaba sobre a indignación que causara entre a corporación municipal o adianto por parte do goberno de Inés Rey de adiantar a Cea do Deporte ao 5 de maio, a escasos días de que empezase a campaña electoral. As reaccións non tardaron en producirse e foron contundentes, sobre todo por un BNG que denunciará ao PSOE ante a Xunta Electoral.
«Este evento realizouse o ano pasado a fins de xuño. Que se mova a data e se coloque no período previo ao comezo da campaña electoral só pode entenderse desde unha perspectiva: estamos ante o intento por parte do Goberno Local de usar recursos públicos, institucionais, para publicitar o labor do propio Goberno Local, o cal contravén por completo o establecido na lei electoral vixente», afirma o portavoz e candidato nacionalista Francisco Jorquera.
Ampárase o Bloque no Artigo 50 da Lei Orgánica do Réxime Electoral, que establece que «desde a convocatoria das eleccións e ata a celebración das mesmas, queda prohibido calquera acto organizado ou financiado, directa ou indirectamente, polos poderes públicos que conteña alusións ás realizacións ou logros obtidos e realizar calquera acto de inauguración de obras ou servizos públicos ou proxectos, calquera que sexa a denominación empregada».
Recorda o grupo que con Inés Rey xa «chove sobre mollado. Días atrás, o BNG denunciara “politicamente” a visita ás Naves do Metrosidero do ministro de Sanidade – que máis que como ministro actuou como axente electoral -, a alcaldesa e outros membros do Goberno Local. Nese momento instamos a alcaldesa a que reflexionase e a que cesasen esas prácticas. Mais tamén lanzamos a advertencia de que, na eventualidade de que continuasen, recorreríamos á Xunta Electoral, cousa que facemos agora”.
Jorquera remata pedindo unha campaña con «xogo limpo, que non se usen recursos públicos, recursos de todos os cidadáns, con fins partidistas, con fins electorais».