Este martes foi aprobada a posta en marcha do programa ‘Mover os baixos’, co que o goberno municipal pretende afrontar o problema dos numerosos locais comerciais baleiros nas rúas da Coruña.
A Xunta de Goberno Local deulle luz verde a este acordo entre o PSOE e Marea Atlántica, que o puxo como unha das condicións para a aprobación dos Orzamentos deste ano. Consiste na creación dun banco municipal de baixos comerciais en alugueiro con garantías, unha convocatoria de subvencións para pemes, micropemes, autónomos e entidades de economía social e a compra de locais por parte do propio Concello a través dun proceso de concorrencia pública para poñelos ao servizo das necesidades da cidade.
O programa, dotado con 3 millóns de euros, espertou de primeiras o escepticismo entre algúns grupos da oposición. Non pola iniciativa, na que hai consenso, pero si en que o Concello concrete unha acción que se lle viña reclamando dende hai moito tempo.
Especialmente crítico foi o BNG, apuntando que a proposta, coa denominación “programa específico de dinamización do comercio cunha bolsa de baixos comerciais en réxime de aluguer”, formaba parte do acordo de investidura subscrito entre o PSdeG e o propio grupo nacionalista ao inicio do mandato.
Jorquera espera feitos antes que palabras, temendo que se trate dun acto máis de propaganda do goberno municipal de Inés Rey: “Discrepamos de como xestionou até agora este asunto. Limitouse, como primeiro paso, a encargar a unha consultora un estudo dos baixos baleiros existentes na cidade cando xa unha asociación empresarial da Coruña fixera un informe ao respecto e o puxera a disposición do Goberno Municipal. Tendo en conta os precedentes agardamos que o acordo adoptado pola Xunta de Goberno non sexa un simple acto propagandístico e serva para a posta en marcha real desta iniciativa, se ben, dado o avanzado do mandato non terá concreción no que resta do mesmo”.