Dende que arrancou o caso do Sindicato de Traballadores da Limpeza o goberno municipal non tivo ningún reparo en botar balóns fora e tratar de que as augas foran calmándose por arte de maxia. A intención de Inés Rey foi sempre que se falara pouco do tema, incluso se para iso fai falla vetar o uso do escano cidadán a un dos traballadores do servizo da limpeza.
Isto foi o que denunciou o BNG, que acusa á alcaldesa de querer tapar o caso e que non se lle dea visibilidade, impedindo a solicitude para preguntar no último pleno antes das eleccións como estaban as investigacións: «A falta de sensibilidade democrática, ese escorregar cara a confusión entre institución (que é de todos) e partido (que é de parte), púxose de manifesto na inadmisíbel decisión de vetar o uso do escano cidadán a un traballador. Discrepamos profundamente dese veto. Pedimos xogo limpo e respecto á dignidade das institucións, que é como pedir respecto ás coruñesas e aos coruñeses».
Jorquera califica esta denegación como » un acto arbitrario por parte do Goberno Local que só se pode entender desde a perspectiva dun executivo que non fixo nada até que se produciu a intervención xudicial e a pesar de que o BNG levara o asunto ao Pleno en dúas ocasións, en abril e xullo de 2022″.
Recordan dende o Bloque que «Hai precedentes abondos de presenza no escano cidadán de traballadores de servizos concesionados do Concello –Nostián ou as bibliotecas municipais, por exemplo, o que indica unha clara intencionalidade política».
A Cea do Deporte, legal pero «non aceptable» éticamente
No Pleno celebrado este xoves tamén falou Jorquera sobre a decisión da Xunta Electora de Zona de desestimar o recurso presentado polo BNG contra a decisión de convocar a Cea do Deporte a uns días do inicio da campaña, o que sigue considerando inaceptable dende «o punto de vista dunha mínima ética política».
Jorquera acepta a decisión, pero tamén recorda que «na súa resolución a Xunta Electoral de Zona advirte taxativamente ao Goberno Local que no desenvolvemento dese acto se absteña de aludir aos supostos logros da súa xestión. Agardamos que o Goberno local a acate no referido á advertencia de respectar o disposto na lei electoral de que non existan alusións ás realizacións ou logros das autoridades intervintes. Máxime cando a primeira en denunciar o incumprimento de moitos compromisos en materia de deporte por parte do Goberno local é a concelleira que foi titular desta área durante a maior parte do mandato».