Despois de tres anos de prórroga forzosa e moitas protestas por parte dos traballadores, o Goberno Municipal púxose en marcha para a renovación do contrato da planta de tratamento de residuos de Nostián. Una das principais novidades é a instalación dun quinto contedor, o amarelo, algo que non convence a todos. De feito, Marea Atlántica vén de presentar alegacións ao anteproxecto e acusa a Inés Rey de intentar impoñer un sistema que supón un paso atrás.
Xan Xove, candidato a alcaldía, apunta que «non precisamos outro contedor ocupando espazo público e espazo tamén na nosa cociña, precisamos defender un modelo de reciclase xa consolidado e moi eficiente». Refírese Xove ao modelo de separación húmido-seco, que segundo os datos do Ministerio para la Transición Ecológica y el Reto Demográfico, permite aos municipios que empregan reciclar unha media de 38 quilos de envases por habitante ao ano, fronte aos 9 quilos que se consegue co sistema de 5 contedores.
Tumban desde Marea o argumento de que o Concello se vexa obrigado a instalar o contedor amarelo, destapando unha mentira máis do goberno municipal: «A obriga é implantar o de materia orgánica, que na Coruña xa funciona desde hai vinte anos».
Esta norma da Unión Europea permite excepcións e niso é no que Xove e os seus lle piden a Inés Rey que traballe, en demostrar que se cumpren criterios coma os seguintes: «Se se acredita suficientemente que este modelo de recollida non afecta á aptitude dos materiais para a reciclaxe, ou se ten un impacto ambiental menor, ou se demostra que é economicamente máis eficiente evita custos desproporcionados».
Segundo sentencia a Marea, «o Real Decreto 1055/2022, sobre envases e residuos de envases, desenvolve a normativa e deixa perfectamente claro que as plantas de tratamento ás que se lles aplique a excepcionalidade antes mencionada terán a consideración de recollida separada recibirán o mesmo financiamento do Estado. Só teñen que cumprir os obxectivos autonómicos de reciclaxe, cousa que Nostián fai de sobra».