Estrañamente feliz se mostran dende Marea Atlántica despois da sentenza do Tribunal Superior de Xustiza de Galicia que declara ilegal o nomeamento de Mónica Martínez como concelleira de Deportes. Porque é certo que foi este grupo o que denunciou ese nomeamento por parte do goberno municipal, pero ao mesmo tempo nunca deixou de ser a muleta que lle permitiu gobernar a Inés Rey e ao seu equipo.
Por iso resultan curiosas certas críticas por parte de María García nas súas reaccións á sentenza: «O seu nomeamento en setembro de 2020 non foi un suceso illado, senón que formaba parte dun plan do PSOE coruñés para reforzar o seu goberno minoritario esquivando a vontade cidadá expresada nas urnas, que lle da á Marea Atlántica un papel decisivo na gobernabilidade».
Parece que, de súpeto, Marea Atlántica está afanada en sinalar a mala xestión socialista: «Agora demóstrase que esa era unha vía morta. Que só hai unha alternativa a este caos dun goberno en constante reorganización, nunha crise tras outra, que sempre rematan coa Alcaldía acumulando competencias sen sentido. Só hai unha alternativa a ver como o Concello da Coruña protagoniza portadas por ter sentenzas xudiciais en contra».
García espera que esta sentenza evite movementos similares no futuro: «É un fito para a causa da rexeneración democrática, que senta precedente, e demostra, como sempre defendemos, que a decisión da alcaldesa de fichar a ex-concelleira de Ciudadanos foi ilegal. Será importante para reforzar o pacto antitransfuguismo e combater calquera violación da vontade popular», engadiu a voceira de Marea Atlántica, referíndose a tamén a casos como a moción de censura en Sada.
O BNG pídelle explicacións a Inés Rey
Pola súa parte, o BNG fai referencia tamén á lista de erros que deixa o goberno do PSOE, representando «o cume da inestabilidade que ten caracterizado o actual mandato de Inés Rey, marcado por sucesivas crises no goberno local (con episodios anteriores como o cesamento da concelleira de Emprego, a renuncia do edil de Urbanismo ou a retirada de competencias ao responsábel de Cultura)».
O propio Jorquera espera que a alcaldesa asuma responsabilidades e, sobre todo, dea explicacións en breve.