Son días de vaivéns no núcleo de Marea Atlántica, que coas eleccións á volta da esquina aposta por facer funambulismo entre as fotos de acordos co goberno municipal, do que foi muleta durante toda a lexislatura, e unha postura máis dura que lle permita separarse e lograr certa autonomía de cara aos comicios.
Hoxe tocou pau a Inés Rey por parte de Xan Xove, candidato a alcaldía pola Marea, que lle reprochou que a deste exercicio vai camiño de ser a peor execución orzamentaria dende 2016. Foi nesa mesma liña María García, apuntando que «o 44 por cento do orzamento está sen gastar. Se atendemos ao investimento, o 85 por cento dos cartos aínda non saíron da caixa do Concello».
Estas declaracións chegan mentres a conta regresiva para presentar unhas novas contas de cara a 2023 estase esgotando. De feito, hai uns días que o nacionalista Jorquera xa daba por feito que non haberá novo orzamento e terá que prorrogarse o de 2022, como xa pasou en 2021. Un novo incumprimento do goberno municipal, que no acordo de investidura pactara co BNG comezar as negociacións dos orzamentos en setembro.
Nese debate sobre as contas organizado por ASCEGA, ao que o PSOE declinou acudir, os diferentes grupos da oposición mostraron tamén a súa preocupación pola falta de execución orzamentaria, unha postura á que agora se suma a Marea Atlántica.
O propio Miguel Lorenzo, candidato do Partido Popular, manifestaba recentemente a súa preocupación: «O importante dun orzamento non é o que se pon, se non o que se executa. Se non se fai, iso si que é un verdadeiro recorte para os coruñeses. O orzamento finánciase co diñeiro que pagan os cidadáns cos seus impostos e a realidade é que non se inviste».