Marea Atlántica continúa sumando queixas contra o Goberno municipal ao que durante 4 anos apoiou de forma constante e incondicional. A última ten que ver co programa ‘Mover os baixos’. Hai uns días acusaba ao PSOE de intentar boicotear a iniciativa e agora pídelle transparencia á hora de informar sobre os resultados da convocatoria.
“A Marea Atlántica reclámalle ao goberno local que faga públicos os resultados da convocatoria de compra pública de locais comercias baleiros que forma parte de “Mover os Baixos”, o programa para afrontar o problema dos locais comerciais baleiros incluído nos acordos para a aprobación dos Orzamentos 2022. O prazo de presentación de ofertas rematou o 9 de marzo, tras dous meses aberto, e non hai ningún tipo de información ao respecto. Para atopala había que mergullarse na Plataforma de Contratación do Sector Público”
Xan Xove, candidato da Marea, acusou de novo á alcaldesa de desentenderse desta acción: “Estamos ante unha convocatoria dotada cun millón de euros, e necesaria, e que respondía a unha necesidade real da Coruña, a de mobilizar baixos baleiros. Pero, a pesar das nosas advertencias, Inés Rey non a tomou en serio e o Concello practicamente non lle deu difusión nin publicidade. Agardamos que iso non a levase ao fracaso”.
Dende o grupo lamentan a desinterese xeral dos seus socios ante una nova proposta: “As tres liñas que forman “Mover os baixos” están a recibir un trato disociado e desigual. Como xa dixemos, a convocatoria de compra de locais publicouse case en segredo. A liña de axudas para pemes e persoas autónomas apareceu por separado e anunciouse por nota de prensa, pero sen ningún tipo de campaña ou medidas de apoio. Aínda segue aberta. Finalmente, á altura do 13 de marzo, nada se sabe da terceira liña de “Mover os baixos”, a bolsa de locais en alugueiro —dotada con 600.000 euros— que debería estarse a lanzar a través de EMVSA”.