Marea Atlántica segue nesa dualidade mostrada durante toda a lexislatura, máis marcada agora que se achegan as eleccións, de ser goberno ou oposición segundo mellor lle conveña. Se hai uns días a súa edil María García aparecía nunha foto con Inés Rey para presumir da ampliación a 8 horas nas escolas infantís, esta semana toca mostrar a parte crítica, cunhas duras manifestacións na que sinalan un novo atraso do Concello na solución aos problemas das bibliotecas municipais.
“En novembro, levamos este asunto ao Pleno, e a presidenta do Comité de Empresa tomou a palabra desde o Escano Cidadán. O goberno local prometeunos a ambas que o mes non remataría sen ter unha solución ao problema do pago dos salarios. Pero a 28 de novembro, non temos ningunha novidade. Volveremos insistir, porque as bibliotecarias non merecen vivir na incerteza mes tras mes, sen saber como e cando van cobrar o salario. E menos ca nunca, en Nadal”, apunta García.
A falta de unhas horas para rematar o mes, o único que ten claro o cadro de persoal é que de novo non cobraron o seu soldo, nin a paga extra que lles corresponde. Nin, por suposto, constan avances na resolución do contrato con LTM Servizos Bibliotecarios.
Xa que a cousa vai de tardanza, tamén lembra Marea Atlántica que o PSOE leva escapando dun pacto pechado no Pleno do pasado 13 de outubro para a creación dunha comisión con presenza de todos os grupos da Corporación e das representantes sindicais das traballadoras para atopar unha solución definitiva. Pasou mes e medio dende entón e o goberno municipal nin sequera pediu a designación de representantes para dita comisión.
Cren dende o grupo que lidera María García que a única solución e o remedio definitivo para rematar con estes problemas e a remunicipalización de todo o servizo.