A Marea Atlántica criticou no Consello de Administración do Instituto Municipal Coruña Espectáculos (IMCE) que o goberno local vaia gastar preto dun 10% do orzamento da entidade para un único evento: o Morriña Fest en Riazor. Este festival, explicaron, custaralle 580.000 euros ás arcas municipais, “unha cifra excesiva para un festival de iniciativa privada e con entrada de pago”. E un festival que chega, ademais, no marco do Xacobeo pero cunha contribución moi inferior por parte da Xunta: algo máis de 400.000 euros.
A única compensación prevista polo executivo municipal para o tecido cultural da cidade é que a empresa promotora do Morriña Fest celebrará concertos gratuítos nos arredores do estadio de Riazor con bandas locais. Marea Atlántica apunta que, malia a que solicitaron información, descoñécese que porción do orzamento total do evento, que ascende a uns 3,4 millóns, se destinará a esa programación local, así como a maioría dos detalles sobre ela. “O contrato non estabelece ningunha garantía ao respecto”, sinalan.
Eses 580.000 euros representan o dobre do que o Concello ten previsto destinar ao Bono Cultura este ano (300.000 euros) e tres veces o reservado para as bolsas de creación artística (180.000 euros). Dúas iniciativas que forman parte do acordo orzamentario coa Marea Atlántica, reforzando a área de Cultura, igual que a creación dun programa de residencias artísticas retribuídas en equipamentos municipais, e que se centran en traballar desde a proximidade, non en fomentar grandes eventos. Instamos ao goberno local a desbloquear estas medidas.
“Os grandes eventos enchen titulares un día, pero son as actividades de base as que realmente teñen impacto na vida da veciñanza e na recuperación dun sector económico, o cultural, moi afectado pola pandemia”, aseguran desde Marea Atlántica, onde aseguran que nunha situación de crise e precariedade coma a que estamos a vivir, o goberno local debería centrarse en garantir o acceso á cultura por parte da maioría da xente da Coruña e en crear oportunidades para as pequenas e medianas empresas e as profesionais da cultura.
“O gasto no Morriña Fest nin sequera vén avalado por un estudo de impacto na cidade, e o que é aínda peor: a preguntas da Marea Atlántica, o goberno municipal recoñeceu esta mañá que será a propia empresa promotora a que se encargue de avaliar a posteriori os beneficios para a cidade da súa actividade comercial”, explica o socio de goberno de Inés Rey, que por estes motivos, abstiveuse á hora de votar no Consello do IMCE a aprobación deste gasto, ao igual que fixo á hora de valorar o modificativo para a incorporación dos remanentes do ano pasado, un asunto que terá que ser debatido e votado no vindeiro pleno. O organismo autónomo pechou o exercicio 2021 en números vermellos, cun desfase negativo entre ingresos e gastos de case 450.000 euros.