Marea Atlántica continúa deixando dardos dirixidos a Inés Rey en cada unha das reunións coa veciñanza que está facendo nestes meses previos á campaña electoral. Probablemente pola proximidade dos comicios, Xan Xove e os seus parecen esquecer que foron, como pouco, cómplices desde goberno municipal ao que agora critican. A última queixa foi unha das habituais, o desentendemento dende o Concello polos barrios da Coruña e, como apuntou Iago Martínez, a falta de compromiso coa «cidade que non se ve dende os Cantóns».
Neses termos se pronunciou o vicevoceiro de Marea nun encontro no Castrillón para propoñer rematar o deseño dun novo espazo público entre Hernandáez e Concordia. Así, criticou que «Inés Rey non fose quen de completar o traballo do alcalde Xulio Ferreiro malia a ter todo a favor, cos terreos xa expropiados e co apoio orzamentario da Marea Atlántica ao longo do mandato. Falta dedicación, sobran relevos nas concellarías e demóstrase un escaso compromiso coa cidade que non se ve dende os Cantóns».
Xove explicou que “este terreo é propiedade do Concello, porque foi expropiado durante o mandato de Xulio Ferreiro, atendendo a unha demanda reiterada nos orzamentos participativos e liderada pola entidade veciñal. Pero leva catro anos sen recibir o impulso que merece e vai sendo hora de desbloquealo, aproveitar o traballo feito e darlle a esta futura praza os usos que demanda a veciñanza”.
En Marea apuntan que durante o mes de marzo reuniuse coa Asociación de Comerciantes do Castrillón, Eirís e Monelos para coñecer as necesidades dos barrios. Os problemas son comúns e máis que sinalados pola veciñanza durante toda a lexislatura: obstáculos na mobilidade, falta de limpeza e abandono do espazo público.