O candidato a alcaldía da Marea Atlántica, Xan Xove, mantivo un encontro con representantes do Comité de Empresa das bibliotecas municipais de xestión privada, e puideron constatar que unha parte do persoal ten pendentes de cobro vacacións do ano 2022. Dende o Goberno Municipal intentaron arranxar o problema de impagos cun traspaso da xestión dunha empresa privada a outra, pero o único que conseguiron foi que se culpen entre elas mentres, apunta o grupo que facilitou o goberno nestes anos, «o executivo local elude as súas responsabilidades».
“Prometera resolver o problema do impago de salarios nas bibliotecas, e apostou pola solución de traspasar o contrato, unha solución que estamos a ver que non foi abonda. Agora non poden mirar para outro lado, o goberno é responsable do servizo e ten que facerse cargo de que as traballadoras cobren todo o que se lles debe”, sinalou Xan Xove.
O traspaso da xestión sempre se viu dende a Corporación municipal como un parche. Un atallo de Inés Rey que non fai máis que atrasar o acordado no Pleno. Recordan dende Marea que aínda non se puxo en marcha a comisión para estudar a remunicipalización de todo o servizo, proposta apoiada polo PSOE no pasado mes de outubro. A uns meses das eleccións, pregúntanse Xove e os seus canto tempo precisa a alcaldesa para cumprir a súa palabra.
No Pleno do 13 de outubro, o PSOE pactou coa Marea Atlántica crear unha comisión con presenza dos grupos da Corporación e das representantes sindicais das traballadoras, na que estudar a remunicipalización de todo o servizo de bibliotecas. Catro meses despois, o goberno local nin sequera pediu a designación de representantes.
“Poñela en marcha é agora máis doado ca nunca —explica Xan Xove—, o groso do traballo técnico xa se fixo no goberno de Xulio Ferreiro. Ademais, o Tribunal Supremo respaldou a subrogación da plantilla na súa sentenza sobre a remunicipalización do servizo de axuda no fogar de Pamplona, en febreiro de 2022, e Inés Rey pode contar, ata o último día de mandato, cos votos da Marea Atlántica. Non nos vai tremer a man, non imos deixar de facer o correcto por intereses electoralistas”, engadiu o candidato á Alcaldía.
A rede de bibliotecas municipais conta con tres centros de xestión pública, nos que nunca houbo problemas para cobrar o soldo, e seis centros de xestión privada, nos que as traballadoras seguen pendentes de impagos desde o ano pasado: Centro Ágora, Fórum Metropolitano, Sagrada Familia, Os Rosales, Infantil e Xuvenil e o punto de lectura de Novo Mesoiro.
Dende Marea Atlántica demandan resposta de Inés Rey: «É o momento de apostar pola remunicipalización de todos os centros e rematar con esta inxusta dualidade creada por un goberno do PSOE».