A pesares da entrada no novo ano, o último Pleno de 2023 continúa deixando reaccións na corporación municipal da Coruña. O rexeitamento por parte da oposición de pagar 2,3 millóns ao Estado para recuperar o antigo cárcere da Torre provocou diferentes reaccións, entre as que están as duras críticas de Marea Atlántica.
Son críticas ademais directas á alcaldesa e a súa incapacidade negociadora: «O futuro do cárcere da Torre non pode quedar bloqueado porque Inés Rey sexa incapaz de presentar unha boa proposta de acordo. A súa obriga é procurar unha alternativa, que é posible, e se a ela non se lle ocorre, levámoslla nós ao Pleno», así de rotundo se expresaba Xan Xove.
A fractura entre PSOE e Marea medra con cada día que pasa e o grupo que durante toda a lexislatura permitiu o goberno dos socialistas, carga agora con todo apuntando incluso que o motivo polo que se propuxo pagar ese diñeiro, unha sentenza xudicial, non existe: «Non se corresponden con ningunha sentenza xudicial. A presunta débeda de 2,8 millóns e unha presunta quita de pouco máis de 500.000 euros só veñen dun pacto negociado pola alcaldesa, pero o único que dixeron os xulgados, polo de agora, é que segue vixente o convenio asinado en 2005 por Francisco Vázquez que obriga a pagar 1,1 millóns de euros». Estas son palabras da voceira María García, que pon o foco sobre a «letra pequena» do acordo tumbado pola oposición, que cargaba ao Concello coa obriga de rehabilitar o edificio, tarefa taxada en 30 millóns de euros.
Pedir responsabilidades ao Estado
A crítica de Marea Atlántica non queda só no PSOE coruñés. Chega tamén ao goberno central e concretamente ao Sociedad de Infraestructuras y Equipamientos Penitenciarios y de la Seguridad del Estado (SIEPSE), responsable do mantemento do cárcere.
De esta forma, levará ao Pleno una moción para abrirlle expediente ao Estado «por faltar de xeito continuado á súa obriga de rehabilitación e conservación do antigo penal, en lugar de indultalo na letra pequena dun acordo no que a alcaldesa quería comprometerse a non acudir á vía xudicial polos danos no edificio».