Segue a Marea Atlántica dándose conta de que a xestión do goberno por parte de Inés Rey, á que mantiveron no poder durante os últimos catro anos, probablemente non sexa a mellor para a cidade da Coruña. As críticas do grupo que foi muleta de goberno nesta lexislatura multiplicáronse nas últimas semanas e a última chega debido ao bloqueo dunha proposta que pretendía frear a proliferación de pisos turísitcos.
Segundo apunta Xan Xove, candidato á alcaldía, “Presentamos unha iniciativa con encaixe legal, e que podería aprobarse este xoves no Pleno para frear a proliferación de vivendas de uso turístico e iniciar a regulación dun sector que agora medra sen control. Podería facerse, pero Inés Rey impediuno. Sen motivo e sen explicación, non permitirá que se debata e se vote no Pleno”.
Pretendía a Marea que se impuxera unha moratoria dun ano na autorización de pisos turísticos na Coruña, pero a alcaldesa decidiu non incluílo na orde do día: “Está a facerse en Santiago de Compostela, nesta mesma provincia, por un alcalde do mesmo partido de Inés Rey. O que falta na Coruña é vontade política. Ata o punto de rexeitar unha proposta que xa lle damos feita, entregada cun laciño e á que só tiña que votar que si”, apunta María García.
Cando faltan só uns meses para as próximas eleccións municipais, Marea Atlántica segue dándose conta aos poucos de que o PSOE coruñés deixa acordos sen cumprir, especialmente en materia de vivenda coma os 9 millóns de euros do orzamento que quedaron sen tocar.
A Coruña, co alugueiro medio máis caro
A Coruña rexistra o prezo medio do alugueiro máis caro en Galicia, uns 571,3 euros ao mes que supoñen 100 euros máis que a media galega. O prezo aumentou un 42 por cento en oito anos. Un dos motivos é a expansión das vivendas de uso turístico, que hoxe en día superan xa ás destinadas ao alugueiro: 700 contra 500.