Parece que Xan Xove quere facerse notar nas súas primeiras semanas como candidato a alcaldía pola Marea Atlántica. O grupo que serviu de muleta durante esta lexislatura para que o PSOE puidera gobernar rebélase agora, advertíndolle a Inés Rey que se lle acaban as escusas: «O tempo das promesas acabou, é a hora de que o goberno cumpra o que xa temos acordado».
Xove foi máis alá na súa crítica ao goberno municipal, sinalando especialmente que ve a un grupo socialista «falto de ideas e decepcionante, incapaz de dar resposta aos retos que temos diante. O PSOE de Ines Rey non ten proxecto nin iniciativas para afrontar a crise social, a emerxencia climática, os retos de mobilidade, a loita contra a desigualdade…».
Para Marea Atlántica, hai asuntos urxentes encima da mesa que non poden atrasarse máis. Entre eles está o pacto polo dereito á vivenda, con 9 millóns de euros no Orzamento de 2022. Fondos que, na súa maioría, aínda non se tocaron. Na mesma situación está o programa Mover os Baixos, para combater a proliferación de locais baleiros, que conta con tres millóns e que a súa execución está a cero.
Xove tamén foi crítico nun dos aspectos que máis se lle reclama a Inés Rey tamén dende a veciñanza: o abandono dos barrios. «Parece que as obras se executan máis rápido canto máis cerca do 15001, apuntou o candidato, poñendo como exemplo proxectos sen avances no último ano como a escola infantil e o centro de día en Xuxán, a biblioteca de Novo Mesoiro ou as obras no mercado de Santa Lucía, entre outros.