O Concello da Coruña, en colaboración coa Asociación Cultural e Recreativa Tempo Novo de Elviña e Castro, organizou para este domingo 30 de abril a Noite dos Crutos, unha sesión de concertos ao aire libre cun cartel encabezado por Luar na Lubre.
Pero as actividades da xornada van moito máis alá dos eventos musicais que terán lugar a última hora da tarde. Dende as 10:00 horas están programadas visitas guiadas gratuítas polo Castro de Elviña – para as que hai que reservar praza chamando ao 981 189 850 – e outras actuacións de balde como as de Os Rexumeiros ou a A. C. Maghúa.
Dende as 19:00 horas, Xurxo Souto exercerá de presentador dos concertos nos que participarán Maghúa, Le Gall-Carré, Os Rexumeiros e, para pechar, Luar na Lubre. As entradas, que teñen un prezo de 10 euros, poden conseguirse na web ataquilla.com e tamén no despacho de billetes central da praza de Ourense.
Servizo de buses dende Praza de Pontevedra
Para favorecer o desprazamento dos interesados en acudir á Noite dos Crutos, haberá un servizo especial de autobuses lanzadeira dende a Praza de Pontevedra ata o Castro de Elviña. Dende ás 18.00 horas pasarán cunha frecuencia de 10 minutos ata ás 19:30 horas pasando por Juan Flórez, San Pedro de Mezonzo, Alfonso Molina, Pajaritas e a pasarela de Matogrande. Cando rematen os concertos, dende as 23.00 horas, haberá transporte de volta tamén para os diferentes barrios.