Os traballadores de Díez e CIA, empresa concesionaria do mantemento e conservación da sinalización vertical e horizontal do Concello da Coruña, manifestáronse esta semana en María Pita para esixir o que consideran un trato xusto na aplicación do convenio colectivo correspondente.
O candidato do BNG, Francisco Jorquera, recolleu as protestas dos traballadores y reclámalle ao Goberno municipal que é o momento de dar a cara por eles cunha labor de mediación coa empresa. Simplemente piden que se aplique o convenio colectivo da provincia da Coruña, xa que a empresa ten a súa sede en Pocomaco e presta os servizos ao Concello, e non o de Madrid, como ocorre agora.
«O convenio de referencia é o convenio do metal da provincia da Coruña, por se tratar dunha empresa que ten a súa sede na nosa cidade e que presta os seus servizos ao Concello. Este é o criterio que debe rexer o labor de mediación do Goberno Local neste conflito laboral».
Haberá que esperar agora á resposta por parte do goberno de Inés Rey, que conta cun historial previo no que cando ten que elixir entre poñerse de parte de empresas concesionarias ou traballadores, adoita quedar coas primeiras.