O candidato á alcaldía da Coruña polo BNG, Francisco Jorquera, foi moi crítico esta mañá co Goberno central despois do anuncio de hai uns días relativo a vivenda. Concretamente co Ministerio de Defensa, polo que entende como un comportamento impropio: «Deixe de se comportar como unha inmobiliaria e ceda os terreos ao Concello, sen custo, para que A Coruña poda engrosar o seu parque municipal de vivendas».
O nacionalista reclama concreción: «Lembremos que o que pretendía Defensa era vender este soar de Adelaida Muro a unha inmobiliaria privada para que construíse vivendas de luxo. Felizmente iso xa non vai ser así. Mais continúa sen concretar de que propiedades dispón na cidade para as ceder ao Concello e a fórmula que se vai recorrer é moi confusa. Defensa vai vender os soares ao Ministerio de Transportes, Mobilidade e Axenda Urbana e este será quen constrúa as vivendas».
Jorquera criticou tamén o momento da iniciativa para ceder as propiedades do SAREB, «durante anos defendemos que se cedesen e díxosenos que iso era imposíbel. Demandamos transparencia: que se esclareza o número de inmóbeis de que dispón e que estean en boas condicións de habitabilidade».
Mentres denuncia ao PSOE e reclama para A Coruña «un alcalde que sexa esixente coas administracións competentes en materia de vivenda», o candidato do BNG volveu a pedir o voto para o seu grupo porque «é o xeito máis útil de lle imprimir ese cambio de rumbo á cidade».
A realidade apunta a que ese cambio do que fala Jorquera cos votos ao BNG será un pacto cos socialistas para que Inés Rey continúe sendo a alcaldesa que o Bloque tanto censurou nesta lexislatura.