«Menos anuncios publicitarios e máis compromisos nos orzamentos do Estado». O portavoz do BNG en María Pita, Francisco Jorquera, avalía nestes termos o encontro habido este luns na Coruña entre a alcaldesa e a ministra de Transportes, Mobilidade e Axenda Urbana: “O compromiso do Goberno central coa Coruña ten que se plasmar nos orzamentos do Estado, non en anuncios publicitarios”
Jorquera remarca que as partidas que aparecen nas contas estatais para 2023 para obras como a reforma da Avenida da Vedra, a ampliación da Ponte Pasaxe ou a Cuarta Rolda son “testemuñais”. Canto á reforma da Avenida da Vedra, subliña o voceiro nacionalista que “aínda que as obras se licitasen en 2023, coas partidas que figuran nos orzamentos é imposíbel que se comecen a executar nese ano”.
Para Jorquera, a reunión Inés Rey-Raquel Sánchez é “máis noticia polo que non se anunciou que polo que si se anunciou”. E así, nese sentido, enfatiza que “hai ausencias clamorosas”, entre elas a falta de partidas para a modernización da liña ferroviaria Ferrol-A Coruña ou para a implantación de servizos de proximidade ou cercanías.
“É un insulto”, estendeuse, “que de novo só figure unha dotación ridícula, de apenas 28 mil euros, para o bypass de Betanzos”. “Os problemas de mobilidade na comarca da Coruña non se arranxan apostando só polo vehículo particular”, acrecentou. Ausencia clamorosa tamén, apunta, a da solución á débeda do porto. “O anuncio que estamos a agardar é que o Goberno Central teña disposición a formar parte dun consorcio que asuma a transformación da fachada marítima, achegando nos vindeiros anos unha cantidade equivalente á débeda que pesa sobre a Autoridade Portuaria pola construción dunha infraestrutura decidida nun Consello de Ministros”.
Tampouco houbo ningún compromiso por parte da ministra en orde a financiar a rehabilitación do antigo cárcere provincial. Para Jorquera, non é de recibo “que o Concello teña que pagar 2,3 millóns de euros pola cesión da titularidade dun edificio en ruínas e a Administración central nin sequera se comprometa a financiar a súa restauración”.
En todo caso, avanzou Jorquera que o BNG está a traballar na preparación de emendas aos orzamentos do Estado e, nesa dirección, salientou que “agardamos que os diputados de PP, PSOE e Unidas Podemos as apoien”. “Ese sería o mellor compromiso coa Coruña no canto de anuncios publicitarios”, concluíu.