Non foi demasiado convincente Inés Rey no segundo acto de presentación do proxecto de Alfonso Molina en poucos meses. Ou polo menos iso se pode deducir das críticas que chegan dende a corporación municipal, empezando polo candidato do BNG Francisco Jorquera: «Son necesarias realidades e non anuncios, sobre todo anuncios en época preelectoral».
No Bloque teñen claro que todos os adornos empregados pola alcaldesa só serven para camuflar unha realidade: «Nos orzamentos xerais do Estado para 2023 só aparece unha partida dun millón de euros para reformar a Avenida da Vedra e os partidos no goberno do Estado votaron contra a emenda do BNG a eses orzamentos xerais para que a dotación se incrementase até os 5 millóns de euros. Como realidade tamén é que a previsión plurianual só contempla outra partida para 2024 identicamente insuficiente de tamén un millón de euros. Por certo que a dotación orzamentaria para 2023 xa fora en orzamentos anteriores, sen ser executada”.
Segundo anunciou o goberno municipal, as obras teñen un orzamento de cas 30 millóns de euros. Pero ollando ás contas estatais, o máximo comprometido ata 2026 é de 16 millóns de euros, polo que non habería fondos suficientes para que se executen antes desa data unhas obras que teñen unha duración estimada de 24 meses.
O BNG lamenta a ausencia de un plan para o transporte público
Critica tamén o BNG a falta de aposta polo transporte público nun proxecto que considera xa nace anticuado: «Esa aposta debería concretarse na habilitación dun carril VAO na Avenida da Vedra, como vía para fomentar o uso do transporte público. A proposta da implantación do carril VAO na Vedra –como tamén na futura reforma da Avenida da Pasaxe- figuraba nunha moción defendida polo BNG que foi aprobada no Pleno de decembro de 2022. Infelizmente esa proposta non figura no proxecto presentado onte, un proxecto que non se adecúa ás necesidades da mobilidade na área metropolitana da Coruña. É máis un proxecto para o século XX do que para o século XXI”.