A campaña electoral colle velocidade e esta pasada fin de semana estivo cargada de actos polos diferentes puntos da comunidade autónoma. Un deles tivo lugar en Cee, onde compartiron micrófono o ministro de Xustiza Félix Bolaños, a candidata pola provincia da Coruña Patricia Iglesias, a propia alcaldesa de Cee Margarita Lamela e o secretario xeral do PSdeG, Valentín González Formoso.
Foi precisamente Formoso o que acaparou protagonismo cunha idea clara: poñer como exemplo de bo goberno en Galicia os concellos liderados polo seu partido: «A Galicia que funciona é a Galicia dos concellos«, apuntaba en clara referencia ao lema do Partido Popular.
O acto estivo marcado por escasas propostas e numerosos ataques precisamente ao Partido Popular. «Esa parella, Rueda e Feijóo, que gripou o motor de Galicia. Cando pechas un colexio ou un centro de saúde, estás matando a unha vila do rural».
Os socialistas centráronse na sanidade e na educación como bases do seu programa despois de que Bolaños sinalase a desidia do PP: «Queremos volver coidar a sanidade, queremos que a sanidade pública galega volva ser o que nunca debeu deixar de ser. Galicia xógase moito para pasar páxina dun goberno da Xunta esgotado».
Para rematar, Patricia Iglesias quixo poñer en valor que «as grandes reformas sempre viñeron da man de gobernos socialistas. Temos que crer que o proxecto que lidera Besteiro é un proxecto de ambición de país e orgullo galego».