Na mesma liña recente de duras críticas contra o goberno ao que sostivo co seu apoio durante toda a lexislatura, Marea Atlántica volve cargar contra a xestión de Inés Rey no que se refire á idea que a alcaldesa ten do urbanismo na Coruña, un modelo que dende o grupo se considera obsoleto.
Xan Xove e María García ofreceron unha rolda de prensa na que mostraron o seu rexeitamento polo que consideran «febre urbanística» a tres meses das eleccións municipais: «Preocúpanos este ronsel de proxectos que Inés Rey está a impulsar sen a mínima reflexión, todos eles modelos obsoletos e herdeiros do plantexamento urbanístico dos anos 90 e con altas doses de formigón«.
O candidato de Marea reclámalle ao PSOE que non tome decisións que comprometan o futuro da cidade, sobre todo se hai un cambio en María Pita: «Pedímoslle á alcaldesa que non hipoteque ao novo goberno que sairá en maio das urnas con decisións urbanísticas que nin suman nin son progresistas. Dentro de tres meses, despois das eleccións, será o momento de revisar o Plan Xeral de Ordenamento Municipal».
San Pedro de Visma, a Agra de Santo Amaro, o cambiazo na Cidade das TIC, a reactivación das Percebeiras… «Estase a destar unha febre urbanística nas últimas semanas arredor de Inés Rey que a alcaldesa parece asumir sen plena conciencia. Máis que presidir un goberno e facer política urbanística, parece que leva unha xestoría de intereses inmobiliarios de terceiros», apuntou María García.
Especialmente críticos foron dende Marea Atlántica co xiro de 180 grados que dou o proxecto da Cidade das TIC. Denuncian que o Goberno municipal cedeu ante as presións do Ministerio de Defensa, que esixía eliminar zonas verdes, espazos abertos e incluso o aparcamento disuasorio: «O proxecto tivo un moi bo punto de partida, pero avanza no sentido contrario. Queren convertelo nun polígono industrial á vella usanza, pechado sobre si mesmo e separado da cidade».