A Marea Atlántica defenderá no vindeiro pleno do Concello da Coruña unha moción na que reclama que se lle retiren a Juan Carlos de Borbón todas as honras outorgadas polo Concello e que se reprobe a súa conduta na recente visita a Sanxenxo, tras dous anos «fuxido», explica a Marea, a Abu Dabi. Os concelleiros da formación que apoia ao boerno local de Coruña estima que o monarca «evita responsabilidades polos seus actos». Nesta iniciativa tamén insta ao Congreso dos Deputados a investigar os indicios de delito na actividade do rei emérito, e a modificar o artigo 56 da Constitución, que lle atribúe ao monarca unha anacrónica inviolabilidade ante a Lei.
«Hai indicios de que Juan Carlos de Borbón, puido cometer fraude fiscal, branqueo de capitais e suborno, tanto antes coma despois de abdicar, pero non rendeu contas por estes feitos, por mor da súa inviolabilidade, a prescrición dos delitos e, nos casos máis recentes, as facilidades que as institucións do Estado lle deron para regularizar a súa situación», apunta a Marea nun comunicado.
A moción sinala que o monarca puxo de manifesto no seu fugaz regreso “o seu desprezo pola obriga de exemplaridade e honorabilidade a que o compromete a natureza do seu cargo, así como unha completa falta de sensibilidade e respecto cara a cidadanía do común”.
A Marea apunta que Juan Carlos de Borbón, que hai case medio século pilotou a Transición da ditadura franquista a unha democracia parlamentaria, «converteuse na proba vivinte de que manter a figura dun Xefe de Estado por enriba da lei é unha idea incompatible cunha sociedade democrática». Califica o seu compotamento a fin de semana pasada en Sanxenxo como «moi pouco exemplar» e inciden en que desprazarse nun jet pagado por un emir de Abu Dabi, vulnera o código de conduta do que se dotou a propia Casa Real española.
«Nun momento no que as institucións públicas deberían dar exemplo de compromiso e responsabilidade, non de impunidade, levamos o debate ao Pleno do Concello da Coruña e agardamos contar co apoio de toda a Corporación para reprobar o comportamento de Juan Carlos de Borbón», conclúe a formación mareante no seu comunicado.