A piscina municipal de Outes acolleu esta mañá o derradeiro curso e o acto de clausura do III Seminario Intensivo de Defensa Persoal Feminina promovido pola Deputación da Coruña, unha iniciativa que remata esta terceira edición cun balance moi positivo: máis de 300 mulleres entre os 12 e os 70 anos participaron nos diferentes cursos celebrados por toda a provincia.
O deputado de Deportes, Antonio Leira, que participou no acto de entrega de diplomas, destacou a importancia deste programa «non só para fomentar hábitos de vida saudables, senón tamén para dotar as mulleres de ferramentas prácticas que reforcen a súa confianza e autonomía persoal».
Os seminarios, de carácter totalmente gratuíto, desenvolvéronse en colaboración cos concellos participantes (Cedeira, Ordes, Valdoviño, Negreira, A Pobra do Caramiñal, Cerceda, Arzúa e Outes) e contaron con talleres de tres horas de duración impartidos por especialistas, nos que as asistentes recibiron formación básica en técnicas de defensa persoal, ademais de traballar aspectos físicos e emocionais relacionados coa autoprotección.
A Deputación da Coruña aposta así por unha programación deportiva inclusiva e con perspectiva de xénero, que contribúe á igualdade real e á loita contra as violencias machistas, tamén desde o ámbito do deporte.