O presidente da Xunta, Alfonso Rueda, pediulle ao novo delegado do Goberno en Galicia, José Ramón Gómez Besteiro, que exerza de “avogado dos intereses” da comunidade diante do Estado e que sexa o delegado de «tódolos galegos e galegas». Así o defendeu na súa intervención no acto da toma de posesión, no que lle garantiu “lealdade e colaboración” por parte da Administración galega.
Rueda amosouse honrado de presidir esta toma de posesión, que encadrou dentro dunha “nova demostración da normalidade institucional” que considerou “marca” da Comunidade. Precisamente, apelou ao deber de todas as persoas con responsabilidades públicas de facer de Galicia “un refuxio fronte as turbulencias”. “O noso paso polas institucións só terá sentido se contribuímos á estabilidade”, advertiu.
Aclarou, de todos xeitos, que esta procura de consensos non significa que as Administracións “deban estar sempre de acordo”, aínda que se amosou partidario de que os lexítimos diferentes puntos de vista “non leven a desentenderse nunca do ben común”.
“Traballo e traballarei para que a Xunta teña co Goberno central moitos máis consensos que desencontros”, comprometeuse Rueda, quen, neste senso, amosouse convencido de que ambas administracións serán capaces de crear “estabilidade, certezas e unidade no esencial” co obxecto de solucionar as dificultades e problemas da xente e serlle útil.
Por este motivo, adiantoulle ao novo delegado do Goberno que a Xunta seguirá traballando intensamente ante o Executivo central para facer realidade as “grandes reivindicacións” da Comunidade. En concreto, apuntou á melloras nas infraestruturas, o bo aproveitamento dos fondos Next Generation, o desenvolvemento das competencias autonómicas, e que se acheguen solucións aos problemas da sanidade galega, que considerou comúns aos do resto do Estado.
“A folla de ruta de Galicia non pode ser ideolóxica, nin partidista, ten que ser asumible polas institucións, administracións e responsables políticos de todo signo, e así será posible que esta terra avance”, concluíu o presidente da Xunta.