O vicepresidente segundo e conselleiro de Presidencia, Xustiza e Deportes, Diego Calvo, destacou hoxe a importancia de apostar pola mellora da fachada marítima de cidades como A Coruña abrindo as urbes ao mar a través dos seus peiraos interiores para desfrute da cidadanía. Así o explicou durante o acto no que a conselleira de Infraestruturas e Mobilidade, Ethel Vázquez, e o presidente da Autoridade Portuaria da Coruña, Martín Fernández Prado, asinaron o convenio de colaboración para a execución dunha estrutura flotante na zona do Parrote do Porto da Coruña destinada á realización de actividades náutico deportivas.
O importe total da actuación recollida no convenio ascende a 3,1 M€, dos que a Xunta achega máis do 90% -case 2,9M€- a través deste acordo no que, por parte do Goberno galego, participan a Consellería de Infraestruturas e Mobilidade e a Consellería de Medio Ambiente, Territorio e Vivenda.
A estrutura flotante en formigón prefabricado contará cun revestimento de madeira mellorando así a comodidade dos usuarios e con pasarelas accesibles para chegar ata esta infraestrutura. Ademais, habilitarase un edificio onde aloxar actividades complementarias -aseos, almacén, vestiarios ou hostalería- e de servizo á práctica dos deportes náuticos, localizado sobre unha plataforma pilotada que sobrevoe o dique.
Neste caso, apostarase pola realización de deportes náuticos, tendo en conta que a comunidade conta con instalacións axeitadas como o porto da Coruña onde acoller iniciativas vencelladas ao turismo náutico e deportivo. Xunto coas boas condicións das infraestruturas portuarias, Diego Calvo resaltou as excelentes condicións de navegación do litoral galego que contribúen a promover este tipo de deportes e, en definitiva, integrar os portos nas vilas costeiras e axudar á súa apertura ao mar.
Pola súa parte, o presidente da Autoridade Portuaria da Coruña, Martín Fernández Prado, destacou o interese da Xunta na iniciativa e anunciou que se licitará de xeito inmediato a redacción do proxecto construtivo definitivo co obxectivo de que se poidan executar as obras ao longo de 2024. Ademais, engadiu que, tras abrir esta zona ao baño o pasado verán, coa posta en marcha desta estrutura flotante dáse un paso moi importante na creación dunha infraestrutura náutica similar as doutras cidades europeas como Liverpool, Oslo ou Helsinki.