A Xunta de Galicia deu un novo paso para desbloquear o convenio para a construción do Novo CHUAC despois de que o Concello da Coruña introducise cambios de última hora e de forma unilateral. Nun escrito remitido o pasado martes a María Pita, dende o goberno autonómico citaban para unha reunión urxente a Díaz Gallego, concelleiro de Urbanismo, co obxectivo de desbloquear o conflito e evitar máis atrasos nesta infraestrutura.
No escrito, no que se propoñen como datas este xoves ou o próximo mércores 1 de marzo, dende a Xunta deixan claro que, máis alá do encontro, o convenio terá que ser revisado e, polo tanto, pasar de novo polo Pleno: «Sen prexuízo de que sexa necesaria unha reunión que permita aclarar a motivación que levou ao Concello a introducir os cambios que afectan á titularidade dos terreos, o texto aprobado polo Pleno do Concello debe ser modificado, recuperando a cláusula acordada en novembro do 2022 relativa á titularidade dos terreos e corrixindo a cláusula relativa ao financiamento, eliminando a anualidade de 2022 e adecuándoa ás anualidades correspondentes para a execución da actuación».
A Consellería de Infraestruturas e Mobilidade considera de «modificación de enorme calado» a introducida polo Concello sobre a titularidade dos terreos e esperan explicacións por parte Díaz Gallego: «Non resulta comprensible que o Concello da Coruña, onde se pretende executar a infraestrutura sanitaria máis importante da Comunidade Autónoma, cunha inversión da Xunta de Galicia cercana aos 500 millóns de euros, sexa o único concello de Galicia que non acepte o sistema empregado pola Consellería de Sanidade nos diferentes convenios de colaboración asinados para a execución de infraestruturas sanitarias».
O executivo galego lamenta que o que sistema que si serviu para concellos como o de Pontevedra no Hospital de Montecelo, ou para Lalín e Meis nos seus respectivos centros de saúde, non sirva para A Coruña.
Insistencia nas anualidades de 2022
A Xunta tamén deixa por escrito a súa sorpresa pola insistencia do Concello en seguir incluíndo no convenio»para a actuación relativa á expropiación dos terreos, a anualidade de 2022 sabendo, como calquera xestor debe saber, que o convenio non podía tramitarse no ano 2022 (máxime cando o Concello remite a documentación o día 2 de xaneiro de 2023)».
Neste caso, a construción do novo CHUAC pode chocar cun problema que os diferentes grupos municipais veñen sinalando nos últimos meses: a falta de Orzamentos para 2023.
O goberno autonómico remata reiterando «o máximo compromiso da Xunta de levar a bo porto a sinatura do convenio que permita evitar máis dilacións no inicio das obras dunha infraestrutura tan importante e necesaria para a cidade da Coruña e esperamos a máxima colaboración por parte do Concello e a máxima lealdade institucional».