A Universidade da Coruña está somerxida nun proceso de actualización e modernización da organización dos postos de traballo do seu Persoal de Administración e Servizos (PAS), nun proceso que comezou en outubro de 2020 coa negociación dunha nova proposta de Relación de Postos de Traballo (RPT).
As conversas entre Xerencia e a Xunta de Persoal comezaron coa constitución dunha mesa negociadora ad hoc formada, ademais de por Xerencia, por dous representantes de cada sindicato con presenza na Xunta de Persoal. A proposta inicial de RPT foise modificando ao longo das diversas reunións mantidas nestes nove meses e culminará coa presentación do proxecto ante o Consello de Goberno da UDC.
A nova RPT baséase en tres principios básicos: flexibilidade funcional; especialización de mandos directivos e intermedios e mellora da eficiencia da organización e prestación de servizos, sen prexudicar ningún posto de traballo. Dentro dun contexto non expansivo de novas contratacións, preténdese mellorar a eficiencia do desempeño de forma que se adapte a unha administración moderna e dar un mellor servizo á cidadanía.
A flexibilización funcional ten que ver cun reparto de traballo equitativo entre todo o persoal, de forma que os picos de traballo poidan ser asumidos por compañeiros que nese momento teñan menos carga laboral. Este principio aséntase nas competencias que como funcionarios da administración xeral ten o PAS, con coñecementos suficientes para desempeñar tarefas de carácter xeral. A especialización, apuntada como segundo principio da nova RPT, apúntase como básica para o persoal directivo e en mandos intermedios, responsable da organización do traballo da súa unidade ou servizo. Entre outras novidades que aporta a nova proposta é a creación dun escala de finanzas, con persoal experto en Contabilidade que vén a cubrir unha carencia existente actualmente.
Finalmente, o terceiro principio en que se asenta a RPT é a mellora da eficiencia da organización e prestación de servizos. Isto quere dicir que se propicie o traballo en equipo, de tal forma que a ausencia dun traballador (por motivos de vacacións, baixa, etc.) poida minorarse coa asunción das súas tarefas polo resto de persoal e que non haxa paróns nos trámites administrativos.
A Relación de Postos de Traballo do PAS da UDC establece así mesmo unha proposta de cuestións xerais comúns a todas as unidades administrativas:
- Dependencia directa e inmediata da xefatura da unidade de todos os postos base.
- Redacción e descrición dos postos evitando a linguaxe sexista.
- Eliminación da especialidade, con carácter xeral, nas xefaturas de negociado.
- Eliminación da columna vacante / non vacante.
- Eliminación da columna singularizado / non singularizado.
- Inclusión da columna denominada “Admón.”
- Eliminación das Unidades de Axuda á Docencia e Investigación (UADI’s)
- Incorporación do requisito de idioma inglés en postos base de cada unidade administrativa da RPT.
- Introdución do grupo “B”.
- Establecemento do concurso específico como forma de provisión, con carácter xeral, para os postos denominados xefaturas de servizo.
A nova proposta de RPT, que mantén todos os efectivos existentes, ten un incremento neto de postos de traballo que ascende a 19.
A RPT actual entrou en vigor en 2016, a nova proposta plantéxase como unha ferramenta na organización de efectivos, susceptible de melloras posteriores pois se entende como un proxecto que se fai entre todo o persoal da UDC.