O próximo sábado 6 de maio terá lugar no Forum Metropolitano a 17ª edición de ‘Durme no Forum’ organizada polo Concello da Coruña. Nesta ocasión a aventura que se propón é adentrarse no mundo de Jumanji para vivir unha noite de difícil de esquecer.
O evento está dirixido a nenas e nenos nados entre o 2011 e o 2016 que estean a cursar a educación primaria. O prazo de inscrición abre este mércores 19 de abril a partir das 9.00 horas e haberá límite de 180 participantes, cun evento que non se realizará en caso de que non se chegue aos 100.
O prezo da actividade é de 25 euros por participante, cota que inclúe a cea do sábado e o almorzo do domingo pola mañá, ademais de todos os materiais necesarios para as actividades. En caso de que finalmente teña que suspenderse, devolveríase o diñeiro da inscrición.
Como xa acontecera o ano pasado co universo ‘Star Wars’, nesta ocasión o tema escollido para o ‘Durme no Forum’ é Jumanji, cunha proposta que ten como obxectivo explorar os recunchos do Forum para topar, descubrir e vivir as innumerables aventuras que o taboleiro do xogo ofrece.
Toda a información sobre esta edición, inscrición e instrucións están dispoñibles nesta ligazón.